Ål kulturhus er eit regionalt kulturhus for heile Hallingdal. Huset har i alt tre amfisalar og er ein stor aktør på kino, scenearrangement, seminar og møteverksemd. Kulturhuset har rundt 30 000 besøkjande på kino og scenearrangement i eit normalt år, og me ynskjer å levere høg kvalitet på alt me gjer. Den store, nye satsinga på huset er SPRANG, ei nasjonal scene for produksjon og formidling av dans generelt og folkedans spesielt. Lokala er spesialbygde for dans, med unike tekniske løysingar for akustiske framføringar. Sprang husar både norske og internasjonale dansekunstnarar gjennom residensopphald, samproduksjonar og eige danseprogram, og jobbar i tillegg aktivt med rekruttering, talentutvikling og ivaretaking av både sceniske og tradisjonelle danseformer. Kulturskulen, bibliotek, frivilligsentralen, innvandrartenesta og vaksenopplæringa held også til på huset, det same gjer Nesch-museet og Galleri Syningen.