Digitaliserings- og forvaltningsdepartementet har om lag 170 tilsette og er sekretariat for digitaliserings- og forvaltningsministeren. Departementet har ansvar for IT- og forvaltningspolitikk, elektronisk kommunikasjon, statleg arbeidsgivarpolitikk, statleg bygg- og eigedomsforvaltning, det administrative ansvaret for statsforvaltarane og arbeid med berekraftsmåla. Blant dei underliggjande etatane til departementet og verksemder er Digitaliseringsdirektoratet, Datatilsynet, Nasjonal kommunikasjonsmyndigheit (Nkom), Statsbygg, Tryggings- og serviceorganisasjonen til departementa (DSS), Departementenes digitaliseringsorganisasjon (DIO) og statsforvaltarane.
Avdeling for styring og organisasjon sørgjer for stabsfunksjonar for den politiske leiinga og departementsråden, utviklar styringssystem og fastset overordna retningslinjer for ei effektiv og samordna leiing av departementet. Avdelinga tek seg av administrative fellessaker og ser til at verksemda skjer innanfor gjeldande reglar og retningslinjer på det administrative området.