100% stilling som fagleiar Odda kino og kulturscener

Vil du leia Odda kino og kulturscener? 

Ullensvang kommune søkjer etter fagleiar i 100 % stilling. 

Ullensvang kommune søkjer ein engasjert, strukturert og utviklingsorientert fagleiar for Odda kino og kulturscener. I denne rolla får du det faglege og operative ansvaret for å fylla våre felles arenaer med film, magi og levande kultur – inkludert det unike og historiske Lindehuset. 

Om stillinga 

Som fagleiar får du ein nøkkelrolle i å koordinera, drifta og vidareutvikla kulturtilbodet i Ullensvang kommune. Du vil ha overordna ansvar for den daglege driften av kinoen, koordinering av kulturscenene og utleige/aktivitet i Lindehuset. Stillinga krev at du trivst i skjæringspunktet mellom administrasjon, teknisk koordinering og vertskap. 

Sentrale arbeidsoppgåver 

● Kinodrift: Ansvar for repertoarvalg, ekstern booking, filmframsyning, markedsføring og oppsett av vaktlister for personalet. 

● Kulturscene og Lindehuset: Koordinering av kulturarrangement, konsertar og førestillingar. Dette inneber tett samarbeid med lokale lag, organisasjonar og profesjonelle aktørar. 

● Drifts- og utleigeansvar: Handtering av utleigehenvendingar, kontraktar og logistikk knytt til Lindehuset og Odda kino. 

● Økonomi, administrasjon og personal: Budsjettoppfølging for ansvarsområdet, rapportering og søknader om tilskot (t.e. Film & Kino). Du blir næraste leiar for dei tilsette og vil ha personalansvar saman med verksemdsleiar. 

● Utvikling: Videreutvikla konsept som events og målretta tiltak for barn, unge og eldre. 

● Andre arbeidsoppgåver kan kome i tillegg.

Kvalifikasjonar og eigenskapar 

Me ser etter deg som har:

● Relevant høgare utdanning innan kulturleiing, prosjektleiing, administrasjon eller tilsvarande (relevant erfaring kan kompensera for utdanningskravet).

● Erfaring frå kulturadministrasjon, prosjektdrift, kino eller arrangementsavvikling. 

● God økonomisk forståing og erfaring med enklare budsjettarbeid.

● Gode digitale ferdigheiter (erfaring med bookingsystem og kinofaglege system er ein fordel). 

● Særskilt god skriftleg og munnleg framstillingsevne på norsk.

● Du vil få nødvendig kinoteknisk opplæring og må forplikta deg til å gjennomføra denne. 

Personlege eigenskapar: 

● Du er ein strukturert og løysingsorientert person som held hovudet kaldt når det kokar. 

● Du har gode samarbeidsevner og trivst i rolla som brubyggjar mellom kommune, kulturliv og næringsliv. 

● Du har eit godt og smittande humør, og er ein open og sosial person som trivst med mange ulike oppgåver. 

● Du likar å møta menneske og yta god service. 

● Du likar å ta initiativ, vera kreativ og finna gode løysingar. 

● Du kan leia andre tilsette til å gje publikum gode kulturopplevingar.

● Du er ansvarsbevisst, punktleg og til å stola på. 

● Du er fleksibel, då kvelds- og helgearbeid må påreknast. 

Løn og arbeidstid etter gjeldande avtalar 

Sletting av utdanningsgjeld/studielån:

Ullensvang kommune er omfatta av ordninga.

Alle som bur i ein av dei 189 kommunane på SSBs sentralitetsnivå 5 og 6 kan få sletta 25 000 kroner av utdanningsgjelda i året frå januar 2026. Du må vera busett i ein av desse kommunane, og vera yrkesaktiv, i minst eitt år. Du vil få sletta utdanningsgjeld kvart år, fram til gjelda er nedbetalt. Tiltaket gjeld all typar utdanningsgjeld, uavhengig av når ho er teken opp. Ein person som bur i ein av desse kommunane frå 1. januar 2025, eller flyttar dit når som helst etter denne datoen, vil etter eitt års butid vera kvalifisert til å få sletta gjeld.

Til orientering om Offentleglova:

Utgangspunktet er at alle søkjarnamn er offentlege etter Offentleglova. Det betyr at ditt namn vert gjort offentleg på kommunen si postliste når du har søkt ledig stilling.
For å gjera unntak må kommunen ha heimel i lova og vurdera konkret i kvar sak kva som er grunnen til unntaket.
I følgje offentleglova § 25 vert det stilt følgjande krav for å få unntak:
"Det kan likevel gjerast unntak frå innsyn for opplysningar om ein søkjar dersom vedkommande sjølv ber om det. Ved vurderinga av om ei slik oppmoding skal takast til følgje, skal det leggjast vekt på om det knyter seg særleg offentleg interesse til stillinga. I utlysinga skal det gjerast oppmerksam på at opplysningar om søkjaren kan bli gjort offentlege sjølv om søkjaren har oppmoda om ikkje å bli ført opp på søkjarlista. Dersom oppmodinga ikkje blir teke til følgje, skal søkjaren varslast om dette.

Arbeidsavtalar i Ullensvang kommune:

Dei som vert tilsett i Ullensvang kommune får tilsendt arbeidsavtale til digital signering. Du får tilsendt sms og e-post med link til digital arbeidsavtale. Viss du har fått munnleg melding om at du er tilsett vil du få tilsendt arbeidsavtale. Viss du ikkje får e–post i innboksen din, sjekk uønska e-post/søppelpost, eller fylge følgjande link: https://signering.posten.no/